31 Outubro, 2016
Por acordo do Consello de Administración, convócase Xunta Xeral Extraordinaria de accionistas da Sociedade Ignacio de las Cuevas, S. A., que se celebrará na sala de reunión do domicilio social, sito en Rúa dos Teceláns, 5, Ourense, en primeira convocatoria o día 12 de decembro de 2016, ás doce horas, ou o día seguinte no mesmo lugar e hora, en segunda convocatoria.
Ver enlace
26 Outubro, 2016
• É o terceiro na provincia e o oitavo en Galicia no seu formato.
• Conta con 651 metros cadrados e xerará dez empregos directos.
Baixo a marca Plenus, o formato de supermercados de proximidade, o Grupo Cuevas abre hoxe mércores en Lugo cidade un establecemento de 650 metros cadrados de superficie. Con esta nova apertura, Cuevas duplica a rede deste tipo de centros en Galicia en apenas dous anos e medio, o que representa un decidido impulso á extensión da súa oferta de marcas propias por toda Galicia e ao crecemento da rede comercial da compañía no segmento polo miúdo, que se completa coas tendas Aquí e Aquié, ás que se sumou o pasado ano a insignia Cuevas-Spar que conta xa con cinco establecementos en distintas localidades da provincia lucense, na que se está facendo un especial esforzo de aproximación, segundo recoñecen fontes da compañía.
A nova tenda, que se sitúa na rúa San Roque, unha das máis transitadas da cidade e nunha contorna de forte actividade e competencia comercial, xerará inicialmente dez empregos directos. Do mesmo xeito que os demais centros do grupo, apostará pola fortaleza da sección de frescos e polos produtos galegos, así como unha oferta capaz de combinar primeiras marcas e prezos moi competitivos, e moverá en conxunto ao redor de 3.000 referencias de produto.
A marca Plenus foi creada en 2011 mediante un formato novo en España. Artur Yuste, director xeral do grupo, destaca que “os Plenus están concibidos como tendas de proximidade, tanto para medianas como grandes poboacións, cun target moi variado e centrados en lograr unha importante redución de custos sen afectar en ningún caso á máxima calidade dos produtos, con marcas de referencia e unha atención preferente aos clientes”.
Con esta apertura, a rede Plenus alcanza xa as oito tendas en Galicia (dúas en Ourense, tres en Pontevedra e tres en Lugo), cunha superficie conxunta que supera os 4.000 metros cadrados (1.417 metros cadrados en Lugo). En total, os distintos establecementos integrados no grupo Cuevas a través dos diferentes formatos de venda en Galicia –incluída a distribución almacenista a través dos Cash&Carry– superan os 34.000 metros cadrados de superficie de venda, dos que o 13 % corresponden á provincia de Lugo. O plan de negocio do grupo prevé varias aperturas en datas próximas, ata alcanzar o 37.000 metros cadrados no curto prazo.
O grupo Cuevas, que cumprirá 150 anos en 2017, superou en 2015 a barreira dos 500 traballadores e máis de 200 empregos indirectos na comunidade galega, cunha cifra de negocio por encima dos 90 millóns de euros. Nese mesmo período duplicou os seus investimentos, e incrementou un 52 % o resultado bruto de explotación (ebitda), en plena expansión comercial da compañía.
Ver imaxe
25 Outubro, 2016
Unha vez ao ano –mágoa non foran máis- guindamos brochazos ao aire, coma espantando o frío, remexemos os sentimentos, coloreamos a rutina con bos desexos e a vida píntase de Nadal.
Ben, pois xa falta pouco. Preparemos os pinceis, os máis grandes para cubrilo todo, pero tamén os máis pequenos, para os detalles. Pintemos coas mans coma os nenos e desfrutemos coma eles enzoufándonos de maxia e enchendo os pantalóns de lamparóns verde esperanza, azul ilusión, amarelo ledicia, vermello pasión…
Que o Nadal saque as túas mellores cores…
Descargar Catálogo
20 Outubro, 2016
Os supermercados Aquié en Ourense, O Porriño e en Santiago de Compostela, e o supermercado Plenus ubicado na rúa Camelias de Vigo, adheríronse aos proxectos de aforro e eficiencia enerxética na industria e os servizos que promociona o Inega e financia o Fondo Europeo de Desenvolvemento Rexional, en beneficio da sostenibilidade medioambiental.
Ampliar nova
Ampliar noticia
24 Agosto, 2016
A fábrica do Grupo Cuevas acaba de superar as auditorías de International Food Standard (IFS) efectuadas nas súas instalacións. O certificado internacional, recibido pola empresa ourensá, garante e asegura os máis estritos estándares en materia de seguridade e calidade alimentaria nos seus procesos produtivos, que no caso de Cuevas e Cía. se centra nas conservas vexetais e de modo singular na castaña e os seus derivados. O selo IFS, que só se concede tras un exhaustivo proceso de verificación de todos os elementos que interveñen na cadea alimentaria, e que é esixido polas principais firmas de distribución internacionais, permitiralle ao grupo Cuevas acceder a novos mercados e seguir o seu proceso de expansión coas máximas garantías esixidas no sector.
A tamén coñecida como Norma Internacional para os Alimentos (IFS polas súas siglas en inglés) é unha das máis esixentes no seu ámbito, e vela pola seguridade alimentaria co obxectivo de permitir a avaliación da seguridade dos provedores de alimentos e sistemas de calidade, de acordo cun criterio uniforme. Este estándar IFS é de aplicación xeral para toda a cadea de subministración de alimentos con exclusión do sector agrícola.
O distintivo IFS cobre normas comúns de auditoría internacionalmente aceptadas, e dálles unha resposta concreta e firme ás expectativas de alta seguridade dos consumidores. O seu desenvolvemento baséase na crecente demanda dos consumidores, as responsabilidades cada vez maiores de distribuidores e almacenistas, as crecentes esixencias no ámbito legal e a globalización das subministracións de produtos. Todos estes puntos fan que sexa imprescindible o certificado para desenvolver un control de calidade uniforme e estándar na seguridade alimentaria.
Para as empresas do sector alimentario, a adopción de normas de calidade e seguridade alimentaria, e en especial da norma IFS, supoñen importantes beneficios e vantaxes, como facilitar o control de todas as etapas de produción, e asegurar a inocuidade dos alimentos producidos ou envasados. Así mesmo, proporciónanlles aos clientes unha visión panorámica das fortalezas e debilidades dos seus provedores, aseguran unha maior facilidade para a comparación e transparencia ao longo de toda a cadea de subministración, e cara aos consumidores garanten a calidade e a fiabilidade nos produtos
As estritas auditorías IFS outórganlles aos produtos do
grupo Cuevas a máxima seguridade e fiabilidade alimentaria