28 Abril, 2020
A situación de emerxencia sanitaria por mor do Coronavirus provocou que moitos produtores agroalimentarios galegos viran pechadas as súas canles de distribución habituais.
Mercaproximidade, a canle alternativa de comercialización para eses produtos agrogandeiros galegos de proximidade, conta agora cunha campaña de sensibilización, #VoudeSúperFeirón, unha iniciativa coa que potenciar que os consumidores galegos apoien aos nosos produtores nuns momentos nos que viron minguadas as súas vendas.
As feiras, os feiróns e os locais de restauración aínda non se puxeron en marcha, pero os seus produtos non poden agardar. É o momento de lles axudar!
En Grupo Cuevas, a través da nosa rede de supermercados Aquié, Plenus e Aquí, tamén colaboraremos para que gandeiros, agricultoras, viticultores, apicultoras, bodegueiros, queixeiras… poidan seguir vendendo os seus marabillosos Produtos Galegos, pero agora tamén nos nosos súper.
Ver anuncio
24 Abril, 2020
E é a quenda das nais! Porque sabemos que as conversacións cómplices e as apertas coas nosas nais se van facer de rogar, un pouquiño máis, propoñémosvos un sorteo para ir preparando ese reencontro no que tamén celebraremos o #DÍADANAI deste 2020…
Participar é ben sinxelo. Toma nota:
1º. Comenta neste mesmo post: Que lugar elixiredes para tomar esa primeira cunca de café ou esa primeira infusión xuntos tras o confinamento?
2º. Etiqueta a dous amigos xunto á túa resposta.
Tes tempo para participar ata o 29 de abril ás 12:00 h do mediodía.
Consulta aquí as bases legais
16 Abril, 2020
Mercaproximidade. Ese é o nome da nova canle de comercialización de produtos do sector primario posto en marcha pola Consellería do Medio Rural para dar saída ás producións de agricultores e gandeiros golpeados polo peche da hostalería, a suspensión das feiras ou a clausura dalgúns mercados municipais.
Os supermercados de Grupo Cuevas adhírense a este programa poñendo ao dispor dos clientes produtos dos agricultores e gandeiros que, pola súa banda, tamén se adhiran ao proxecto ofrecendo os seus produtos.
A idea non só é dar saída a estes produtos, a través da súa comercialización en supermercados senón que tamén busca dar a coñecer ao consumidor a orixe dos produtos que compra.
A apertura da canle irá acompañada dunha campaña informativa dirixida ao consumidor final para dar a coñecer aos produtores que a integran, ademais das empresas distribuidoras que colaboran.
8 Abril, 2020
O programa Bos días de TVG, desprazouse nos días previos a Semana Santa ata o noso supermercado Aquié en Santiago de Compostela para coñecer, de primeira man, que produtos estaban a consumirse máis nos días previos aos festivos. A nosa compañeira Sonia Ferreiro, responsable da tenda, explicoulle que o novo produto estrela é o lévedo para facer respostería en casa.
Podes ver a entrevista completa a partir do minuto 46.50.
Pola súa banda, o informativo de TVE na súa delegación territorial en Galicia, tamén visitou este centro esta semana para continuar o seguimento dos produtos máis demandados polos clientes pasados os días festivos.
Para ver a noticia, pulsar na ligazón de TVE a partir do minuto 4.57.
Ver noticia TVG
Ver noticia TVE
5 Abril, 2020
O diario La Voz de Galicia publica nas súas páxinas do domingo unha entrevista realizada a Nazaret, segunda responsable de tenda en Aquié Fleming. Ela cóntanos, en primeira persoa, como está a vivir esta situación desde o seu traballo no supermercado.
Ler entrevista
