Polbo á mugardesa

15 Xullo, 2015

Polbo á mugardesa

Plato

Segundo prato

Ingredientes

Racións: 1 persona

20 g Aceite de oliva
5 g Allo
50 g Cebola
100 g Pataca
2 g Pemento picante
50 g Pemento vermello
180 g Polbo
1 g Sal
40 g Viño branco

Instruccións

Procedemos á cocción do polbo en auga durante 35 ou 40 min, posteriormente cortámolo en anacos pequenos. Facemos un rustrido con cebola, perexil, allo, pemento vermello e aceite e, cando o rustrido estea a medio facer, engadímoslle un chorriño de viño ou coñac, pemento e un chorro de auga.

Como o seu propio nome indica, este prato é típico da zona de Mugardos na provincia de Coruña. O polbo é capturado nas augas da ría de Ferrol. Acompáñase de patacas cocidas coa pel que contén a maioría de fibra e nutrientes da pataca, en especial a vitamina C. Diferénciase do tradicional “polbo á feira" en que leva cebola e pemento vermello. O pemento vermello ten un gran poder antioxidante, ten efecto analxésico en artrite e reuma e axuda na formación de glóbulos vermellos e brancos. Por outra banda, a cebola é diurética, ten efecto bactericida, evita a formación de coágulos no sangue e é dixestiva.

Polbo á feira

Plato Primeiro prato

Ingredientes

Racións: 1 persona

10 g Aceite de oliva
2 g Pemento doce
150 g Polbo
1 g Sal

Instruccións

Unha das técnicas máis populares de como facer o polbo de xeito que o resultado sexa óptimo é meter e sacar tres veces seguidas a peza en auga fervendo, antes de deixalo, definitivamente, a cocer. Unha vez feito isto, córtase a peza coa axuda dunhas tesoiras (normalmente) e alíñase con pemento, aceite e sal gordo.

O "polbo á feira" é un prato de orixe moderna. O polbo chegaba a Lugo, a Ourense, a Monterroso ou ao Carballiño, procedente de Mugardos na ría de Ferrol, de Bueu na de Pontevedra, de Muros e das illas e ribeiras da ría de Arousa. Hai uns 125 anos, os arrieiros maragatos que acudían ás feiras de gando compraban grandes cantidades de polbo e, nos pobos, preparábano con aceite de oliva e pemento.

Potaxe de garavanzos con patacas e espinacas

Plato Primeiro prato

Ingredientes

Racións: 1 persona

5 g Aceite de oliva
5 g Allo
20 g Bacallau fresco sen sal
30 g Cebola
50 g Espinaca
55 g Garavanzo
1 g Loureiro
20 g Pataca
0.5 g Sal
30 g Tomate

Instruccións

Nunha cazola, póñense a fritir o allo e a cebola partida. Cando empecen a dourarse, engádeselles o tomate e, cando estea fritida esta mestura, incorpóranse as espinacas cortadas, dáselles un par de voltas e bótaselles a auga, os garavanzos, o loureiro e o bacallau. Ao pouco tempo, bótanse as patacas, pero non deben deixar de cocer os garavanzos para que no se endurezan. Se hai que engadir máis auga, debe de estar fervendo. A cocción debe de ser moi lenta para que non se rompan os garavanzos. O bacallau hai que desalgalo 24 horas antes, cambiándolle catro veces a auga; ao tempo, poñemos tamén en remollo os garavanzos. O punto de sal corríxese ao final da cocción.

Os garavanzos teñen un alto contido en fibra e reducen o nivel de colesterol polo que son moi útiles para combater as enfermidades cardiovasculares. Presentan un bo contido en hidratos de carbono de lenta asimilación, o que é moi beneficioso para persoas que padecen diabete. O seu contido en magnesio fai que sexan un bo aliado para combater o estrés. Por outro lado, as espinacas teñen unha cantidade moi baixa de calorías, hidratos de carbono e graxa. As espinacas son ricas en fibra e tamén proporcionan unha gran cantidade de ácido fólico e de vitamina C. As patacas proporcionan unha boa cantidade de hidratos de carbono e vitamina C.

Polbo estilo Arousa

Plato Segundo prato

Ingredientes

Racións: 1 persona

20 g Aceite de oliva
10 g Allo
70 g Cebola
120 g Pataca
1 g Pemento doce
1 g Pemento picante
220 g Polbo
0.5 g Sal

Instruccións

Nunha pota ponse auga a ferver. Somérxese o polbo tres veces, de maneira que os tentáculos se enroscan. A terceira vez déixase o polbo na auga fervendo e cocíñase durante uns 45 min (depende do peso do polbo). Para comprobar o punto de cocción pícase cun escarvadentes. Unha vez feito, apágase o lume e déixase o polbo na auga de cocción para que non arrefríe. Nun pouco de auga da cocción do polbo cócense unhas patacas. Mentres, faise nunha tixola un rustrido de cebolas picadas con aceite e un pouco de sal que servirá para cubrir o polbo, unha vez cortado, e as patacas, xa na fonte.

Esta forma de preparar o polbo xurdiu na illa de Arousa e tamén na illa de Ons. É moito menos popular que o coñecido “polbo á feira" que se consumía nos días sinalados, como os de feira. Ao contrario, o polbo estilo Arousa consumíase diariamente nas illas como sustento de mariñeiros e ao ir acompañado de patacas, cebola nunha especie de refrito, era un prato que presentaba máis calorías e saciaba máis.

Polbo en caldeirada

Plato Segundo prato

Ingredientes

Racións: 1 persona

20 g Aceite de oliva
5 g Allo
50 g Cebola
100 g Pataca
1 g Pemento doce
50 g Pemento vermello
180 g Polbo
1 g Sal

Instruccións

Procedemos a ferver a auga con sal e cunha cebola, unha vez chegue a ebulición, metemos o polbo tres veces seguidas e retirámolo, enseguida, co fin de conseguir que se enrosquen as patas e finalmente deixámolo cocer. Unha vez que estea cocido colocámolo noutro recipiente e no que se coceu o polbo introducimos as patacas para a súa cocción. Mentres, fritimos o polbo picado en anacos nunha tixola con aceite quente, unha vez que estea fritido o polbo engadimos, na mesma tixola, un allo, unha cebola e pemento vermello ata que estean dourados, momento no que engadimos un chisco de pemento. Finalmente, presentamos o polbo xunto coas patacas.

É un prato típico da Costa da Morte. O polbo é rico en sales minerais, vitamina B e presenta unha cantidade mínima de graxa. É unha boa fonte de calcio que prové rixidez e fortaleza aos ósos e prevén enfermidades cardiovasculares entre outras funcións. Cabe destacar que contén un aminoácido denominado taurina, moi importante xa que regula a presión sanguínea, reduce o colesterol e as graxas naturais do sangue, axuda á diminución de coágulos e prevén enfermidades cardiovasculares.

Noticias

Archivos